loader image

أحمد خالد يكتب| ستة وثلاثون حبكة درامية لا يتغيروا في سياق الدراما

وانا بذاكر سيناريو وكتابة دراما مؤخرا أكتشفت إن فى كاتب فرنسى أسمه جورج بولتى عمل كتاب فى القرن ال19 اسمه : THE THIRTY-SIX DRAMATIC SITUATIONS

الكتاب ده بيتكلم عن ان كل القصص فى العالم مبنية على 36 حبكة درامية او موقف درامى مبيتغيروش، كل القصص والحواديت فى الافلام والروايات وقصص الاطفال و الكوميكس والاساطير و القصص الموجودة فى الكتب المقدسة والمسلسلات

كلهم مبيطلعوش من الـ 36 خط درامى اللى قال عليهم بس ممكن يختلفوا فى طريقة العرض مش أكتر
الحبكات الدرامية اللى قال عليهم بالترتيب هم:

1- Supplication / التوسل:
والحبكة دى بتعتمد على 3 عناصر اساسية: الشخص اللى واقع فى مشكلة فا بيقوم بالتوسل، الشئ او الشخص اللى بيهدده سبب المشكلة، والشخص اللى هيتوسل ليه وممكن يساعد

2- Deliverance/ الخلاص:
الحبكة دى شبه اللى قبلها وبتعتمد على واحد فى مشكلة، وواحد سبب المشكلة، وواحد منقذ
لكن الفرق ان المنقذ هنا بيتدخل بالانقاذ من غير ماحد يطلب منه ولا يتوسل له

3- Crime pursued by vengeance/جريمة يتبعها انتقام:
ودى حبكة مشهورة جدا بتبدأ بالجريمة اللى بتحصل بعدين بيبدأ البطل بنتقم من كل اللى عملوا الجريمة، زى فيلم kill bill او فيلم قبضة الهلالى 

4- الانتقام بين الاقارب/ Vengeance taken for kin upon kin :
الحبكة دى بتعتمد على الخلافات اللى بتبقى موجودة فى العائلات مثلا على الميراث او حاجات زى كده و من اشهر الافلام المعتمدة على الحبكة دى The Lion King

5- الملاحقة/ Pursuit :
فى الحبكة دى بيكون البطل طول الفيلم هربان وفى حد طول الوقت عايز يمسكه، ممكن يكون مجرم وهربان من العدالة مثل، او راجل طيب وبيهرب من مجرمين

6- كارثة/Disaster :
الحبكة هنا بتعتمد على ان يحصل كارثة كبيرة تغير الاحداث، ممكن تكون كارثة بيئية زلزال او بركان او تسونامى مثلا او كارثة من صنع البشر عادى

7- Falling Prey to Cruelty or Misfortune/ الوقوع فريسة للقسوة أو لسوء الحظ:
بمعنى ان الدنيا بتكون ماشية كويس وبعدين بيحصل حاجة تغير الاحداث تماما وتخليها اكتر قسوة وتعب

8- Revolt/ الثورة:
الحبكة هنا بتعتمد على التمرد والخروج على الطاغية حتى لو متقدمتش فى شكل ثورة صريحة، ممكن يكون تمرد على الوالدين او على مدرسين فى المدرسة
من الافلام اللى قايمة على الحبكة دى مثلا من غير مايكون فيها ثورة صريحة ومظاهرات فيلم fight club

9- المبادرات الشجاعة/ Daring Enterprise :
الحبكة دى بتعتمد على وجود 3 حاجات، قائد شجاع، هدف مهم، خصم او عدو
فى الاغلب بتكون المبادرة دى كبيرة وشجاعة جدا وممكن تكلف القائد حياته لو فشلت
من الافلام اللى بتعبر عن الحبكة دى فيلم “Saving Private Ryan”

10- اختطاف/ Abduction:
مش محتاجة شرح دى حبكة بتعتمد على خطف وتحرير الرهينة

11- اللغز/ The enigma:
ودى حبكة مشهورة بتعتمد على وجود لغز بيحاول البطل يحله طول الوقت، المحقق كونان مثلا

12- Obtaining/ الكسب او الحصول على:
غالبا بتستخدم لما يكون فى طرفين بينهم مشكلة ويروحوا للمحكمة وطرف منهم يقدم الاوراق اللى تثبت ان الارض مصرية مثلا 

13- العداوة بين الاقرباء/ Enmity of kin :
الحبكة دى شبه الحبكة بتاعة الانتقام بس الفرق هنا ان فى الاولى بيكون حصل شئ يستحق الانتقام لكن هنا بيكون فى كراهية و حقد لشخص من العائلة بدون ما يكون عمل جريمة، من القصص اللى قايمة على الحبكة دى قصة قابيل وهابيل مثلا!

14- Rivalry of kin/ التنافس بين الاقرباء: 
هنا بيكون فى تنافس بين اتنين قرايب او صحاب لكن مبيوصلش لعداوة وغالبا بيكون فى شخص متفوق وحبوب عن الشخص التانى، زى التنافس بين بطوط وابن عمه محظوظ على حب زيزى 

15- جرائم بسبب الخيانة الزوجية/ Murderous adultery:
دى مشهورة اوى وبتتكرر كتير

16- الجنون/ madness :
حبكة بتعتمد وجود شخص مجنون، وناس ضحايا للجنان ده

17- Fatal Imprudence/ التهور القاتل:
الحبكة بتبدأ بإن الشخص يجرب حاجات مجنونة او غريبة او مثلا تجربة علمية مش عارف نتيجيتها وتبدأ الاحداث تتحول لكارثة بسبب الفعل المتهور ده

18- Involuntary crimes of love/ آثام الحب اللاإرادية:
الحبكة بتعتمد على وجود اتنين بيحبوا بعض واكتشاف بيكتشفوه فى وقت ما يبينيلهم ان علاقتهم دى متنفعش لأسباب مهمة لدرجة انه لو كملوا فى العلاقة تبقى جريمة وبتخلى البطل والناس اللى بتتفرج يفكروا هل يكمل فى العلاقة ولا يسيبها

19- قتل القريب دون قصد/ 
Slaying of Unrecognized Kinsman:
زى ما سهير البابلى قتلت بنتها فى مسرحية رايا وسكينة وهى متعرفش انها بنتها

20- التضحية للمبدأ/ Self-Sacrificing for an ideal:
حبكة بتعتمد على وجود شخص مؤمن بمبدأ معين ومستعد يعمل اى حاجة عشان يحافظ على المبدأ ده
زى فيلم hacksaw ridge مثلا

21- Self-sacrifice for kin/ التضحية من أجل الاخرين:
شخص بيضحى بنفسه عشان شخص تانى او اشخاص مش عشان مبدأ

22- All sacrificed for passion/ التضحية بكل شئ من أجل الشغف:
حبكة بتعتمد على ان حد يحب حاجة معينة فا يفقد بسببها كل حاجة فى حياته وهو راضى،
find what you love and let it kill you

23- الحاجة للتضحية بالآخرين/ Necessity of sacrificing loved ones:
حبكة بتعتمد على تضحية البطل بحد بيحبه لأن فى سبب قوى يخليه يعمل كده، زى فيلم لا تسألنى من أنا لما شادية ادت يسرا بنتها للست اللى شغالة عندها، او قصة سيدنا إبراهيم وابنه إسماعيل!

24- Rivalry of superior vs. inferior/ المنافسة بين الافضل والاقل:
منافسة بين اتنين لإثبات مين الاحسن، ممكن منافسة بين الخير والشر او بين الفقير والغنى وكده

25- Adultery/ الخيانة الزوجية:
هى شبه حبكة اللى فوق بس هنا مفيش انتقام

26- Crimes of love/ جرائم فى سبيل الحب:
الحبكة دى غالبا بتستخدم فى الحب بين اتنين ممنوع انهم يحبوا بعض او يكون بينهم علاقة بس هم بيصمموا وبيعملوا جرايم عشان يبقوا مع بعض، وممكن العلاقة بينهم تكون جريمة اساسا لو هم مثليين فى بلد بتمنع ده وهكذا

27- Discovery of a Loved One’s Dishonor/ اكتشاف حقيقة مشينة عن أحد الأقارب:
فيلم العار اكبر مثال على الحبكة دى

28- Obstacles to Love/ عقبات في وجه الحب:
دى الحبكة اللى قايم عليها معظم الافلام الرومانسية حيث اتنين بيحبوا بعض وبيبقى قدامهم شوية مشاكل وصعوبات وبيحلوهم ويبقوا مع بعض او ينتهى الفيلم نهاية مآساوية وميبقوش مع بعض

29- An Enemy Loved/ الوقوع في حب العدو

30- Ambition/ الطموح:
حبكة بتعتمد على بطل عنده طموح كبير زى the pursuit of happyness

31- الصراع مع الإله/ Conflict with a god:
من اكتر الافلام اللى بحبها وبتعتمد على الحبكة دى بطريقة غير مباشرة هو فيلم truman show

32- الغيرة فى غير محلها/ Mistaken jealousy:
حبكة بتعتمد على غيرة غير مبررة او ان طرف فاهم غلط ودماغه مسوحاه ان الطرف التانى بيخونه وبيكشتف انه غلطان بعد مايكون عمل مشاكل كتير

33- Erroneous Judgment/ الأحكام الخاطئة: 
حبكة بتعتمد على اصدار احكام غلط فى حق واحد برئ بدل المجرم الحقيقى

34- Remorse/ الندم:
الحبكة دى بتعتمد على ان البطل يكون عمل جريمة او غلطة وندم عليها وطول الوقت بيحاول يصلح الغلط ده

35- Recovery of a Lost One/ استعادة المفقودين:
حبكة بسيطة عن شخص مفقود وشخص تانى بيدور عليه طول الفيلم، فيلم العفاريت وعودى يابلية مثال 

36- خسارة الأحباء/ Loss of loved ones: 
حبكة بتعتمد على خسارة شخص لحبيبه

دول كل الحبكات اللى قال عنهم عم جورج بولتى، لو انت قريتهم كلهم قولي فى كومنت ايه اكتر فيلم بتحبه والفيلم ده طلع معتمد على انهى حبكة من دول؟

كتب المقال

Ahmed Khaled