أنت لازم تهتم بالكلمات المفتاحية “Keywords” عشان خاطر تحسن ترتيبك في محركات البحث!
أكيد كتير مننا سمع الجملة دي أثناء شغله في مجال المحتوى، البعض ميعرفهاش فيروح على طول لجوجل ويسأله: هو إيه موضوع الكلمات المفتاحية ده؟ وإزاي تساعدني في تحسين ترتيبي في محركات البحث؟
من هنا عرفنا عن عالم جديد اسمه الـSEO “تحسين محركات البحث”، وإن الكلمات المفتاحية هي الكلمات اللي الناس بتستخدمها في محركات البحث عشان توصل لنتائج في موضوع معين، ويبدأ صانع المحتوى يلتزم باستخدامها دايمًا في كل كتاباته في المستقبل.
لكن في الحقيقة مبدأ الكلمات المفتاحية مش مفيد بس من الناحية التقنية، ده كمان بيساعدك في توليد أفكار لكتابة المحتوى، لإن الكلمات المفتاحية هي فعلًا اسم على مسمى، وأوقات بتقدملك مفاتيح كتيرة تنوّر عقلك وتخليك تطلع بأفكار كتيرة.
تعالى ناخد مثال بسيط وليكن عن “كوباية الشاي”، خد من وقتك دقيقة قبل ما تكمل المقال وفكّر لو هتكتب في الموضوع ممكن تقول إيه؟
وتعالى بعدها نفكر في الكلمات المفتاحية المرتبطة بالشاي، مش بس اللي أنت ممكن تستخدمها جوة المقال عشان محركات البحث، لكن كل الكلمات المرتبطة بالشاي، “شاي، شاي بالنعناع، شاي بلبن، كحك، بقسماط، بويلر، سكر، بوتجاز، صداع”
رغم إنّها كلمات بسيطة وممكن تيجي على ذهنك بسهولة، لكن منها ممكن نلاقي عندنا 4 أفكار نكتب عنهم: طريقة عمل الشاي، استخدام الشاي كعلاج للصداع، أنواع الشاي، إزاي تستمتع بكوباية شاي مع البقسماط/الكحك؟
احنا نقدر كمان من خلالها نعمل أنواع مختلفة من المحتوى، مثلًا محتوى تفاعلي: يا ترى إيه أكتر نوع شاي بتفضله؟
الميزة في مبدأ الكلمات المفتاحية إنّه بيوسّع مداركك ويخلي نظرتك للأمور أكتر شمولية، فبدلًا من إنّك تحصر نفسك في التفكير في نقطة واحدة، ده بيخلي عندك نقاط كتيرة تقدر تستفيد منها.
وبالتالي فاستخدام الكلمات المفتاحية بالشكل ده، أحيانًا كتيرة بيكون علاج لقفلة الكتابة، فتقدر تخلق منها أفكار تنتج محتوى. ولو أنت من البداية في شغلك حاولت تجمع الكلمات المفتاحية المرتبطة بمجالك وتاخد منها أفكار كتيرة، ده هيساعدك يكون عندك قائمة أفكار كبيرة متاحة في أي وقت.
يا ترى هتكون إيه هي كلمتك المفتاحية الجاية؟