عزيزي الــ “copy writer” لحظة من فضلك 
زى ما الحب في روايـة “هيبتــا ” لمحمد صادق كان عبارة عن (7) مراحل ، فسمح لي عزيزي أقول إن كمان كتابة الإعلانات بتمر بــ (7) مراحل:
في الرواية كانت مراحل الحب واضحة (البداية – اللقاء – العلاقة – الإدراك – الحقيقة – القرار – هيبتا ) ، وفي كتابة الإعلانات المراحل كمان واضحة.
✦ المرحلة الأولى : مرحلة الــ ” Brief ” أو البداية وتعتبر أهم مرحلة ، لأنك من خلالها هتتعرف على طبيعة المنتج أو الخدمة اللى أنت هتكتب عنها وهتعرف كمان أكتر عن الشريحه اللى أنت بدورك مسؤول أنك تكلم عنها بأسلوب قريب منها وكمان هتتعرف على الــ “Budgets” الخاصة بميزانية الإعلان عشان خيالك ميزعلكش.
عشان كدا مهم أننا نؤمن بمقولة : تسلمنى Brief هسلمك نضيف
✦ المرحلة الثانية : وهى المرحلة اللى حضرتك بتبدأ فيها تبنى الــ “Persona” اللى هتكلم عنها ، وتعرض عليها المنتج أو الخدمة بتاعتك ، بمعنى أنك بتعمل تصور كامل عن العميل بتاعك ( مكانه فين ؟ ، عنده كام سنه ؟ ، بيشتغل ايه ؟، أيه هى الإهتمامات بتاعته ؟) ، عشان كدا نقدر نسمي المرحلة دي مرحلة اللقاء لأنها المرحلة اللى بتتعرف فيها على العميل اللى هتكلمه بشكل دقيق
✦ المرحلة الثالثة : مرحلة الــ “Insight ” ، فى المرحلة دى لازم نتفق على شئ مهم جدًا كل ما كان الــ “Insight ” اللى هتبنى عليه فكرة الــ “copy” بتاعتك قريب من الشريحه اللى أنت بتخاطبها وبيلامس جزء حقيقي عندهم كل ما كانت نسبة نجاح فكرة الإعلان بتاعك أكبر
✦ المرحلة الرابعة : مرحلة الــ “Behavior” ، أنت فى المرحلة الثالثة أخترت الــ “Insight ” اللى هتقوم عليه فكرة الإعلان لكن فى المرحلة دي أنت بتتعرف على السلوك اللى العميل بيقوم بيه عشان يحل المشكله بتاعته
على سبيل المثال 
– كلنا بنكره الصيف عشان الحر ، دا كدا “Insight “.
– عشان كدا بنلبس هدوم خفيفه ، دا كدا الــ “Behavior”
✦ المرحلة الخامسة : مرحلة الــ “Concept” ، أنت خلاص عارف المشكلة اللى عند العميل بتاعك ، وعارف كمان السلوك اللى هو بيقوم بيه عشان يتغلب على المشكله دي. وهنا لازم يكون تركيزك على الحل اللى بتقدمه للعميل ، رساله واضحه بتقول من خلالها للعميل اللى أنت بتخاطبه إن أنا حاسس بيك وبالمشكله اللى أنت بتعانى منها وتفضل الحل.
✦ المرحلة السادسة : مرحلة إختيار الــ “slogan” ، فى المرحلة دى حابب استعين بمقولة “محمد صادق” فى الرواية لما قال : كل ثانية يوضع أمامك إختيار بسيط قد يجعل الحياة كلها مختلفة
وفى كتابة الإعلانات إختيار “slogan” غير مناسب للإعلان وفكرته ممكن يكون سبب في إن الإعلان كله يضيع منك
✦ المرحلة السابعة : مرحلة الــ “Creative treatment” أو المعالجة ، وهنا برضوا هستشهد للمرة الأخيرة بمقولة صادق لما قال : لم يكن يتخيل أنه سيحكي كل شيء بتلك البساطة
لأنك هنا هتكون خلاص قدرت تمشي فى المراحل اللى فاتت دى كلها ،وبقى مطلوب منك تقدم مشهد وحوار لقطعة “copy” تحكى فيها فكرة الإعلان اللى بتخدم المراحل كلها