أنا لسة في الجامعة وعايز أخلص وأشتغل في التسويق بشكل عام والكتابة بشكل خاص، أعمل إيه وأروح فين؟!
بما إن في طلبة وخريجين جداد كتير بيكون عندهم تساؤلات عن إزاي يبدأوا في مجال الكتابة أو التسويق عمومًا، وعشان فكرة إنك تنصح شخص دي مسئولية كبيرة ومش حاجة بسيطة، خلينا نقول إن المقال ده عشان يبسّط شوية على كل واحد لسة في الجامعة وبيد ر س تسويق أو حابب الموضوع وناوي يكمل فيه بعد ما يتخرج، خصوصًا لو شايف في نفسه بذرة كاتب محتوى صغنن، عشان كدة هوضّح هنا بعض النقط بشكل سريع وأقولك إيه أهم حاجات لازم تكون عارفها وأنت لسة في الأول:
- أول حاجة لازم تعرف إن كل ما بدأت تشتغل على نفسك بدري كل ما كان أحسن ليك، وسيبك من موضوع “لما أتخرج أبقى أشوف” صدقني الوقت بيجري أسرع مما تتصور.
- أهم حاجة إنك متدخلش نفسك في حتة” ما أنا معيش فلوس أ خد كورسات “عشان كورسات التسويق وكتابة المحتوى مفيش أكتر منهم أونلاين ومتاح كتير منهم من غير فلوس “ملكش حجة”.
- قعدة القهوة والأنتخة حلوة صحيح، بس لما بتطوّ ل هتلاقي نفسك زهقت، ده غير إنك لو ما استعديتش كويس من وأنت لسه في الجامعة، هتلاقي نفسك لما تتخرج معاك CV وماشي توزعه على الشركات من غير فايدة.
- لازم كمان تقرأ كتير، اها المجال ده زي المياه بعد الرنجة كدة، إقرأ كتير؛ تتعلم أكتر؛ تطور نفسك أسرع.
- عارف بقى أصحابك اللي بتشوفهم في الجامعة لابسين تيشرتات ملونة كدة وجايين يقنعوك تدخل معاهم الـStudent activity .. عارفهم؟؟ اه دول ولاد ناس ومش فاضيين ولا حاجة، إسمع منهم وشوف أيactivity ليها فريق تسويق تدخله، وأكيد هتستفيد وتتعلم وتتعرف على أصحاب وتكوّن دايرة علاقات أوسع شويه تفيدك بعد ما تتخرج كمان وهتكسب ثقة في تعاملاتك مع ناس جديدة، ودي أهم مميزات هتطلع بيها من أي مكان.
- إتفرج على إعلانات وتابع بيدجات زي” ذا كوبي رايتر” كده، وناس سبقوك تتتعلم منهم ويفيدوك.
- دايمًا بص على شغل السوق، عشان تستفيد منه وتقدر بعد كده تطلع زيه وأحسن منه، واه والله حتى أشطر ناس في مجالنا ده بيتفرجوا ويتعلموا من شغل بعض في السوق عشان يطوروا نفسهم عادي جد اً، إنت مش لوحدك يا صديقي.
ودلوقتي أكيد بعد ما قريت الكلام اللي فوق ده -يا رب تكون لسه ما نمتش- بتقول بينك وبين نفسك “كل ده كلام جميل طيب.. أنفّذ إزاي بقى؟؟”.
- شوف يا سيدي، في الواقع حتى اللي بقالهم سنين في المجال كان نفسهم حد يجاوبهم على السؤال ده، بس الحقيقة إن مفيش مصدر واحد صريح كده تقدر من خلاله تقول “أنا خلاص إتعلمت”، لإن مجال التسويق وبالأخص كتابة المحتوى كل يوم من جديد لأجدد، ومصادره هي كل معلومة بتقرأها وبتخليك تطلع بفكرة جديدة.. هتسألني يعني الدنيا هتفضل مش ممسوكة كدة؟؟ هقولك لأ برده وأنا يعني هسيبك كدة يا صلاح؟؟ شوف يا سيدي بعد ما تبدأ تشتغل على الحاجات اللي فوق دي هتلاقي تحت هنا مصادر جمعتهالك لكورسات ومواقع لإعلانات ممكن تتابعهم، عشان تتعلم وتبقى مدرك إيه اللي بيحصل ، كل اللي عليك تدخل على اللينكات دي وتعيش:
- :مصادر لكورسات أونلاين http://bit.ly/2H1yTjw http://bit.ly/2DKJcba
- :مصادر للإعلانات http://bit.ly/2V0q3Yq http://bit.ly/2GWftwE
هتقولي هما دول كفاية؟؟ هقولك خلصهم بس الأول وبعدين نتكلم (;
وفي الآخر أحب أقولك يا عزيزي إن مجالنا بحر واسع، وكل ما حاولت تفهم فيه وبقى عندك معرفه بكل تفاصيله وتخصصاته، كل ما بقيت مميز أكتر، وهتلاقي فرصتك في السوق أسرع بعد ما تخلص الجامعة.
كتب المقال ده: