loader image

أول ما بتسمع كلمة “ماما”، إيه أول حاجة بتيجي في بالك؟

سؤال ممكن يبان غريب ولكن لو فكرت فيه للحظة، هتلاقي ان في كلمات بتختلف معانيها باختلاف الأشخاص اللي بتسمعها.

فلو أنت بتشجع الأهلي من صغرك وقرأت أي حاجة ولقيت اسم الأهلي فيها، هتحس بكمية مشاعر وذكريات كبيرة.

أما لو زملكاوي متعصب ولقيت اسم الأهلي قدامك في امتحان مثلاً، ممكن تقوم وتمشي!

لكن في كلمات ثابتة في النفوس والفطرة، مش بتتغير بتغير الزمان ولا المكان. ثابتة في أفكار كل طفل لسة مولود وبيدور على مصدر للحنان، زي ما هي ثابتة لأي شخص بلغ من العمر خبرات ومشاعر ومقدرش يستغنى عن المصدر الأساسي. ومع اختلاف الأديان فلها نفس المنزلة، ومع اختلاف الألوان واللغات فالحياة من غيرها مشكلة!

لكن حالياً أغلب التقديرات والهدايا بتكون مادية، وده اللي خلى عيد زي عيد الأم يكون من أكثر المواسم اللي فيها مبيعات في أمريكا كل سنة بعد الكريسماس!

فإيه الحكاية؟ وهل التسويق بيلعب دور في الموضوع ولا كانت صدفة؟

بدايات عيد الأم

القصة بدأت من عصر المصريين القدماء، بالأسطورة الشعبية اللي مش هنبالغ لو قولنا أكثر شهرة في التاريخ وهي قصة (إيزيس وأوزوريس).

الأسطورة بدأت لما أخو أوزوريس (واللي كان بيغير من أخوه عشان العرش) قام قاتله و قطع 42 حتة ووزعهم في كل أقاليم مصر وقتها (وللي كان عددهم 42)!

قامت الزوجة الوفية إيزيس واللي كانت بتمثل رمز الأمومة وقتها، بتجميع كل قطع زوجها من كل مكان واتجوزوا وقتها وخلفوا ابنهم حورس، وتوج أوزوريس بملك الموتى وبعدها ابنهم حورس حارب الظلم ورجع النظام من تاني.

الأسطورة انتهت لكن انتقلت بعدها للحضارة اليونانية والرومانية، واشتهر عندهم عيد باسم (Mothering Sunday)، لغاية ما وصل للولايات المتحدة الأمريكية في أوائل القرن اللي فات، واللي رفضها الكونجرس الأمريكي في الأول، لكن مع استمرار المحاولات تم اعتباره عيد رسمي واختلف مواعيده حسب كل بلد.

فمثلاً المملكة المتحدة (UK) بتحتفل بيه يوم 27 مارس، أما في بلد زي ألمانيا فيبقى يوم 8 مايو من كل سنة، ولكن بقى معترف بيه في أغلب دول العالم مع اختلاف التاريخ.

أما في مصر فبنحتفل بيه يوم 21 مارس من كل سنة من أيام الرئيس جمال عبد الناصر، واللي وافق عليه بعد 3 سنين من بداية طرح الفكر على يد مصطفى أمين سنة 1953.

العلاقة بين الأعياد والتسويق

“شقينا فبندلع نفسنا”

جملة مصرية مشهورة جدا سواء تعرفها أو لا، فغالباً أنت بتطبقها في حياتك.

فأنت لو موظف شقيان ومتبهدل طول السنة، وقت الأعياد ده بيبقى زي طوق النجاة، فتبدأ قبلها تحوش وتخطط.

الحقيقة المبدأ ده لو طبقتوا هتلاقي ماشي معاك تقريباً في كل أعياد السنة.

يعني العيد الكبير أو الصغير، افتكر كدة كام تذكرة سينما اشترتها، أو كام محل دخلته واشتريت منه حاجات، أو كام مطعم وكافيه قعدت فيه مع صحابك وقسمتوا الفلوس سوا (أما لو أنت رب أسرة، فربنا يعينك).

طب تعالى نطبقو على الكريسماس وعيد رأس السنة، احسب كدة المبالغ

اللي صرفتها في الخروجات والفسح (قضيتها على السرير، أني أسف).

أما لو عيد الحب “الفلانتين” مش محتاج أفكرك كام الدباديب و الهدايا اللي رايحة جاية كل سنة (طبعاً الكلام مش موجه لعدو المرأة اللي بيفركش قبلها)!

وحاول بقى تفتكر طقم الكوبيات اللي بتجيبوا لوالدتك كل عيد الأم بيتكلف كام (أما لو أنت بتتعامل كاش، فأنت في السليم).

الخلاصة أن مكان ما هتلاقي أعياد واحتفالات، هتلاقي حركة بيع وشراء.

وهنا يجي دور التسويق، فانه يدرس احتياجاتك في المناسبات دي عشان يوفرها لك ويعملك عليها تخفيضات كمان.

وبردو بتكون فرصة قوية جداً لأي شركة حابة أنها تحسن علاقتها مع العملاء بتوعها، وتزيد ثقتهم فيها (Brand Loyalty). عشان كدة الاحتفالات بقت جزء أساسي من أي خطة تسويقية على مدار السنة.

عشان كدة جمعنا ليكم أفضل إعلانات لعيد الأم السنة لسنة 2022 واللي تناولت التنفيذ بشكل مختلف بالرغم من وجود شيء مشترك وهو “عيد الأم”. 

إعلان العربي 2022

أقوى حب – العربى عيد الأم 2022 | العربى جروب

السنة دي العربي جروب تعاونوا مع فرقة (مسار إجباري) عشان يغنوا أغنية عاطفية لخصت مشاعر الأمومة والحنية والآمان من 6 مارس ولحد دلوقتي وصل عدد المشاهدات إلى 589,281 مشاهدة على الـ Youtube وأكيد لسه الرقم في زيادة.  

وهنا بيلخص مقولة مشهورة جداً في التسويق بتقول ” Buy with emotions, Justify with logic”، أكثر من 95% من الأشخاص بتاخد قرارات شرائية بدون تفكير منطقي! وده اللي اكتشفوا علماء الإقتصاد لما درسوا سلوك المُستهلكين في أواخر القرن الـ19.

عشان كدة هتلاقي اعلانات كثير بتكون عاطفية أكثر منها عقلية! لأن ببساطة لو انا حاولت أقنعك بحاجة بطريقة منطقية، هتفكر ألف مرة وممكن متاخدش قرار الشراء. أما لو العاطفة أو الـ (Emotions) فبتاخد قرار على طول بالشراء وبعديها بقى ممكن تفكر في عواقبه.

إعلان فودافون 2022 

الإعلان السنة دي واخد إتجاه مختلف وهو الـ Humor Appeal واستخدم أغنية (تامر عاشور) بتنفيذ مختلف وكمان Insight بيقول إن صحيح الأم مصدر الحنان والآمان بس كمان محتاجة وقت “تفك” شوية عن نفسها وتاخد بريك من مسؤوليات الحياة. 

إعلان فريش 2022 

الإعلان بعنوان “دايمًا” واحشني واللي طبعًا اعتمد على الـ Emotional Appeal وكمان تنفيذ وتصوير الفيديو فيه ريحة بيوتنا وريحة دفا بيت جدتنا يخليك تحس بسعادة وهدوء أول ما تشوفه وتفتكر معاه الذكريات. 

إعلان براند إيما – Emma 

طبعًا ممكن ناس كتير تكون مش عارفة براند Emma ولكن هو براند “طرح للمحجبات” هو صحيح غالي حبة، بس كل ما تغلى حبة تزيد محبة. 

ليه قررنا نتكلم عنه عشان حقيقي بمجهود بسيط تقدر تشوف إن فيه تيم تسويق حتى لو مش كبير قادر من السنة للسنة يعمل كامبين متكاملة وخاصة Digital، السنة دي عملوا إعلان بتشوف معاه مواقف مختلفة إزاي بتحتاج فيها الأم وأنها بتاخد معاك قرارات كتيرة. 

والكامبين موقفتش لحد كدة ولكن عملوا كمان سلسلة حلقات ديجيتال بعنوان “حكاوي ماما” واللي فيها حكايات بين الأم وبنتها بطريقة بسيطة وحقيقية جدًا. 

إعلان مؤسسة مجدي يعقوب 2022 

المعروف عن إعلانات مؤسسة مجدي يعقوب المشاهد الجميلة والمريحة بين كل أفراد العيلة وأن وجود الأبناء بصحة وعافية هي أجمل هدية لكل أم والفويس أوفر للإعلان “هند صبري”. 

إعلان مستشفى بهية 2022 

فيه مثل بيقول: Like mother, like daughter

مهما كبرنا ومهما اختلفنا أوقات كتير مع ماما إلا أننا لازم نكون شبهها في حاجات معينة وده الكونسبت إللي اتبنى عليه إعلان مستشفى بهية السنة دي والفويس أوفر (نيللي كريم) 

الشهر لسه مخلصش بس الأهم من الإعلان هو رضا ست الكل وعارفين إن فيه ناس بيعدي عليهم الشهر ده بسنة عشان “ماما” مش معاهم بس إحنا بنقولهم إحنا معاكم وموجودين دايمًا عشانكم. 

المصادر

  1. https://www.kirstyfrancewrites.co.uk/celebration-marketing/
  2. https://co.agencyspotter.com/celebration-marketing-that-amplifies-brand-loyalty/
  3. https://www.theshelf.com/the-blog/mothers-day/
  4. https://en.wikipedia.org/wiki/Mother%27s_Day
  5. https://www.history.com/topics/holidays/mothers-day
  6. https://egyptianstreets.com/2021/03/21/the-surprising-origins-of-egyptian-mothers-day/
  7. https://www.youtube.com/watch?v=Gh620_r8DXc
  8. https://www.youtube.com/watch?v=_tc8zc0EYM8
  9. https://www.linkedin.com/pulse/people-buy-emotionally-justify-logically-liz-wendling/
  10. https://www.youtube.com/watch?v=Yd7skF-ftdE
  11. https://www.youtube.com/watch?v=h037FOUimLE

Post a comment

Your email address will not be published.