loader image

ما وراء احلى فيو في ماونتن فيو

معروف إنك لما تيجي تعمل إعلان لمنتج في القطاع العقاري بالذات فإنت بتوجه انتباه الجمهور لمميزات المنتج وتتكلم عن السعر وتسهيلاته وفي الآخر بتحط ال CTA اللي يشجع الجمهور يشتري..

طب لو قلتلك اعمل إعلان يكسر الدنيا ويحقق نتايج من غير كل ده؟
صعب صح؟

أحب أفاجئك إن ده بالضبط اللي عمله إعلان Mountain View
لو انت متابع إعلانات Mountain View هتلاقيهم بدأوا من السنة الي فاتت يركزوا على قيمة العيلة واللمة، فهتلاقي في 2021 حققوا نجاح كبير بأغنية “سر السعادة” لحسين الجسمي واللي كان الإعلان بيركز بيها على لمة عيلتين وحياتهم كل يوم وسهراتهم في المصيف.. إلخ

“السنة دي قررنا نعمل حاجة مختلفة”،
دي الجملة اللي بيبتدي بيها الإعلان واللي تشد انتباهك من أول لحظة عشان تعرف أكتر

الإعلان اعتمد على عنصر المشاعر الإنسانية ودي نقطة قوة بتبين قد ايه كاتب الإعلان فاهم ان المستهلك بياخد قرار الشراء بناء على العواطف، لو خاطبتها صح، وده متوقع من كاتب مشهود له بالموهبة زي (أحمد خيري) خريج ورشة سكريبت خانة اللي عملت مسلسل “ونسني” من سنتين، وبرنامج “خمس نجوم” السنة اللي فاتت وبيشارك السنة ككاتب دي في مسلسل (مكتوب عليا).

(أحمد خيري) كمان هو ستاند أب كوميديان في فريق (The Elite – النخبة) اللي بيقدم عروض كوميدية في أماكن زي ساقية الصاوي ومكتبة الإسكندرية.

أبطال الإعلان أشخاص حقيقين، في مكان حقيقي بردود فعل حقيقية، والحقيقي دايمًا بيمسّ القلب

البطل الفعلي للإعلان هو عنصر الـ storytelling.. الإعلان بياخدك في قصة قصيرة من أول دقيقة ويفضل معاك لحد مايوصلك للحظة اللقاء اللي انت مستنيها

✦ الفكرة

فكرة الإعلان هي إن أحلى view بالنسبة للناس هو العيلة ولمة العيلة، ولأن بيوت كتير في مصر فيها حد متغرب عنها بقاله سنين فكان التركيز في الإعلان على مشاعر الاشتياق للمتغرب، والمفاجأة ساعة اللقاء وفرحة الأهل بحبايبهم.

✦ شخصيات الإعلان

الإعلان مافيهوش أي فنان أو شخص مشهور.. اعتمد على ناس حقيقية وإحساس صادق وردود فعل لحظية، جزء كبير من الميزانية اتصرف على تذاكر طيران وفطار عائلي وتجمع وفرحة القلوب، و ده بيكمل فكرة سر السعادة اللي اتعملت السنة اللي فاتت.

✦ تصوير الإعلان

من الحاجات المميزة في الإعلان هو أماكن التصوير، التصوير حصل في أماكن جوة Mountain View ومع ناس عايشين جواها، هنا الإعلان إدالك رسالة غير مباشرة إن المكان قائم فعلا وفيه ناس عايشة حياة متكاملة مش ناقصهم أي حاجة، وإدالك كمان فكرة ضمنية إن علاقتك بالشركة مش بتنتهي بمجرد الشراء، ولكنهم بيفكروا في عملائهم وعلى تواصل مستمر معاهم، ده طبعا غير الـ footage من كاميرات المسافرين اللي ساعدك تشوف مشاعر الناس على الجنب التاني من أول رحلتهم في المطار لحد ماوصلوا مكان اللقاء.

✦ الرسالة

الإعلان بيوصّل لك رسالة بسيطة جدا، السعادة كلها في وجودك وسط أهلك، والـ view مهما كان حلو مش بيكمل غير بناسه.

✦ النتائج

عشان المشاعر الصادقة من الناس الحقيقية بتوصل للقلب من غير استئذان، مش هتستغرب لما تعرف إن الإعلان من ساعة مانزل وكل ردود الفعل عليه إيجابية وحقق نسبة مشاهدة عدت 500 ألف ونسبة تفاعل عدت 41 ألف كومنت، ومن جملة الـ reactions على الفيديو كان 81.5% تقريبًا عبارة عن Love reaction.

وأخيرًا.. تفتكر الإعلان يستاهل جايزة أحسن إعلان السنة دي؟

Creative: Ahmed Khairy
Client: Mountain View

Post a comment

Your email address will not be published.