فلاش باك حبة حلوين أما كنا في اعدادي، وبدأ ظهور المجلات الالكترونية -بديلة الجرائد – اللي ماكناش نعرف غيرها، كان كل همنا اننا لو عايزين نعرف خبر، هنروح على اليوم السابع أو أخبار اليوم من جوجل ونقرأ الخبر ونتنطط منه على خبر تاني لغاية ما نوصل ل (هل ياسمين عبدالعزيز أخت كريم عبدالعزيز؟) . والمفاجأة ان الأخبار كانت متاحة بشكل مجاني 100%. الى أن أتى ذاك السؤال العبقري!
هي الناس دي ازاي بتخسر كده؟ ازاي بيعرضوا المعلومات بشكل مجاني؟ على الأقل الجرايد بتدخل ربح وبندفع فيها جنيه ونص!
ثم يأتي الحاج الكبير أول ماركتير عرفناه منذ نعومة أظافرنا يقولك: شايف اعلانات العقارات اللي ع جنب دي؟ بتدفعلهم فلوس عشان تظهر في المجلة وهي دي اللي مقومة الجريدة الاون لاين وبتدخللهم فلوس حلوة.
نسكت على كده؟ أكيد لا!
المواقع والمجلات زي سوبر ماما وBuzzfeed وسطور … الخ. بيكون ليهم مصادر دخل متعددة غير البوسترات اللي بنشوفها في يمين وشمال الموقع.
والمرادي هنكشفلكم ازاي المواقع دي بتحقق دخل ممتاز بطرق مختلفة:
1- الإعلانات المصورة:
ده النوع اللي كنا بنتكلم عنه فوق، صورة فيها فيلا ومكتوب فيها معلومات تجذبك: امتلك عقارك بمقدم 5000 جنيه. الفلوس بتتعمل فيه ب3 طرق:
- اول طريقة CPC أو cost per click ودي أما بتضغط على الإعلان بيدفع رسوم تلقائي للموقع.
- تاني طريقة CPS أو cost per sale ودي في حالة انك بتضغط على الاعلان وتشتري المنتج، وده أعلى طريقة ربح للموقع من الإعلانات المصورة لأنه بعتمد على المبيعات.
- ثالث طريقة هي اللي الحاج الكبير قالها فوق، ان صاحب الاعلان بيدفع جزء ثابت عشان الاعلان ده يظهر على الموقع.
2- إعلانات الفيديو:
وعشان نقربهالك هنسميها اعلانات الـ Skip AD.
دي اعلانات الموقع أو مجلة نفسها بتعمله وبتعرضه على السوشيال ميديا الي بتدعم خاصية الفيديو، زي: يوتيوب، فيس بوك، انستجرام، سناب شات…) بتعرض فيديو ترويجي ليها خلال فيديوز يوتيوب سواء في الأول أو نصه، أو خلال الستوريز على سناب شات وانستجرام.
3- تسويق بالعمولة أو Affiliate Marketing
هنا الشركة صاحبة المنتج بتدي عمولة للموقع أنه يكتب عن المنتج بدالها، وهنا بييجي دورنا كصناع محتوى وخصوصا أبناءنا من كاتبي المقالات العظماء.
هتلاقي في موقع خدمات تنظيف منازل، منزل مقال ريفيو عن ليه ديتول أحسن منتج في السوق، أو سوبر ماما بتحكيلك ازاي Pampers بتساعد طفلك لنوم أفضل.
وأحيانا الموقع نفسه بيكون ليه قسم كامل اسمه Shopping بيتكلم عن منتجات معينة من خلال المقالات.
4- ايرادات الاشتراك
وانت داخل على الموقع ومبسوط بالمحتوى بتاعه هتلاقي كل شوية بيطلعلك Sign in، Join Us ..الخ
تدخل بكل براءة تلاقيه بيقولك: بخ قفشتك! هات 20 دولار في السنة واستمتع بالمميزات دي.
لكن موقع Good Houskeeping بيديك ليميت معين من المقالات تقرأها وبيقولك: والله يا عسل ده آخر مقال متاح ليك ولازم تشترك معانا وماعندناش غير كده. ده غير benefits تانية بأنه هيوصللك ايميلات وتقدر تعلق على المنتجات وتقول الريفيوز بتاعتك.
تقوم انت زي الشاطر تطنش كل ده، وتدخل من Google Incognito وتكمل مقالاتك في الموقع عادي جدا. 😎
5- إعلان محلي:
وده أكتر نوع إعلان الناس بتحس فيه بالمصداقية، لأنه بيكون في نص المقال وممكن ماتنتبهش أنه إعلان فعلا لأنه ماشي مع السياق.
زي مثلا أما تقرأ مقال عن افضل الأساليب التي تحقق لك الاسترخاء، وتلاقيه في النص ذكر اسم سبا معين بعد ماحكالك عن العلاج الاستشفائي وأهميته وأماكن تروحها زي عين فرعون والرمال الكبريتية.
وأحيانا بتكون الشركة متعاقدة مع الموقع أنهم دايما يذكروا ايجابياتهم وأنهم أحسن ناس في السوق بمقابل رسوم معينة.
وفي سنة من السنين الوسيلة دي كانت بتحقق ربح للمواقع بنسبة 70%.
6- منتجات تابعة للموقع:
من اسمها، دي منتجات الموقع نفسه عاملها وبيبيعها بغض النظر عن الترويج لمنتجات الشركات التانية.
المنتجات دي بتكون بالتعاون مع هايبر ماركت بتبيعلها، زي أما بنشوف Tasty بتاعت الأكلات بتحقق كم رهيب من المبيعات عشان بتبيع كتب طبخ ووصفات أو توابل وخليط كيك …الخ اللي بتعرضه Walmart في أسواقها.
7- إعلان صوتي أو البودكاست
وهنا المجلة أو الموقع بيتعاقد مع إذاعة راديو عشان تتكلم عنها مقابل رسوم ثابتة لكل اعلان صوتي، وكل مايزيد عدد المستمعين، الرسوم بتزيد.
المجلات تقدر تستخدم بعض الأساليب دي في زيادة دخلها، وفيه اللي يقدر ينفذهم كلهم عشان ربنا يوسع عليه أكتر وينتشر أسرع.
لكن في الآخر، خلينا متفقين إنك عرفت هتعمل ايه وازاي هتحقق أرباح أكتر أما تكون صاحب موقع أو مجلة مستقبلا.
شاركونا بأكتر طريقة ماحسيتوهاش سهلة في تنفيذها؟