أكيد سمعت عروض بياعين المترو وأكيد في مرة اشتريت منهم أو حد جمبك أشترى منهم.

بس السؤال هل الناس بتشترى علشان السعر ولا علشان طريقته في ترويج المنتج؟

تعالوا ندرس أقوال البياعين ونتعلم منهم إزاي نكتب محتوى يخليك بياع شاطر.

1-دخول البياع لعربية المترو

بمجرد دخول البياع للعربية واختياره لمكان معين في العربية وتركيز كلامه لأشخاص معينين كدا أنت بتعمل حاجة اسمها buyer persona أو تحديد فئة مستهدفة، المحتوى بتاعك موجه ليهم ..  الفئة دي أنت المفروض تكون عارف سنها، وظائفهم، دراستهم، اللايف ستايل، متوسط الدخل، مشاكلهم، اهتماماتهم، رجال ولا إناث، بيسكنوا فين غالباً… كل دا علشان تعرف تسوق منتجك أو فكرتك للناس الصح وبشكل مظبوط وبالنسبة للبياع يقدر يستشفها بحكم خبرته في التعامل مع كافة أنواع الناس يوميًا.

2- متشتريش قبل التجربة ياباشا

.. من أهم الخطوات بعد تحديد الفئة المستهدفة إنك تكون عارف الهدف بالظبط من الكونتنت. فتقدر تعمل brand awareness content هدفك فيه تعرف الناس الميزة التنافسية اللي عندك وايه المشاكل اللي منتجك هيحلها، أو valuable content وهنا هتركز إنك تفيد العملاء بمعلومات تحسن استخدامهم أو زيادة توعية للصناعة نفسها عن طريق معلومات جديدة.

بالإضافة إلى engagement content كمان مش بس بتركز على الـ branding أو ال adding value قد ما هتركز إنك تخلق تفاعل مع العميل إما بهدف رفع ريتش الصفحة، أو استغلال تريند بشكل محترف. وأخيراً ال Selling content ودا المحتوى المخصص للبيع بتحاول تركز إنه يكون وصف شامل للمنتج وكمان مقنع للعميل بالشراء سواء هتخليه عليه خصم أو بأي طريقة تاني مناسبة ليك.

3- صلوا على النبي كدا قبل ما نكسب.. دي الصلاة على النبي كلها مكسب

عرفت تحدد الـ buyer persona بتاعتك والهدف من الكونتنت، لازم تركز في هيدلاين الكونتنت إنه يكون جذاب جداً ويجبر العميل على إنه يقرأ المحتوى كويس ويفهم أنت عاوز توصل أيه. ودا عن طريق إنك تركز على جمل مشهورة، أو تستخدم تريند.. أو حتى كلمات وجمل غريبة تشد العميل من أول نظرة.

4- لعبة لحمادة وعروسة لميادة بخمسة جنيه بس..

ركز في الكونتنت على ال tone of voice وكمان اللغة اللي تناسب عملائك المستهدفين، فهل هتتكلم معاهم ب friendly tone وتستخدم كلمات وألفاظ بسيطة وقريبة من عملائك، ولا formal tone لما تكون بتسوق لكورسات إدارية أو خدمات رجال أعمال، أو تستخدم الfunny tone وأنت بتعمل كوميكس… وكذلك لازم تعرف اللغة اللي هتستخدمها عربي ولا إنجليزي، ولو عربي هيكون فصحى ولا عامية (خد بالك من النقطة دي).

5- حد عاوز حاجة قبل ما أنزل؟

البياع مش بس بيأكد عليك تاني دا كمان بيعملك نوع من أنواع التحفيز إنك تفكر تاني وتشتري المنتج، كذلك مينفعش تخلص المحتوى وأنت مش حاطط Call to action تقول العميل يعمل أيه بعد ما يخلص الكونتنت.. هل هيتصل بيكم، يشير الكونتينت ويمنشن أصحابه… أو على حسب ما أنت تحب. المحتوى التسويقي داخل في كل حاجة في حياتنا والكريتور الشاطر هو اللي يعرف يركز ويستفاد من كل حواليه ويعرف إزاي تعلي من مستواه وتحسنه طريقته.  

وفي النهاية، نحب نقول نصائح بسيطة لكتابة المحتوى:

• خلي لغتك بسيطة وقريبة من القلب
• وضّح العرض من المنتج وإزاي العميل هيستفاد منه
• اختار التوقيت المناسب
• قفل البيعة صح