كل يوم بيجي عدد لا بأس به من المتطوعين عايزين يكتبوا معانا بل وكمان بيكتبوا مع ناس تانية وبالرغم أن فيه ناس منهم كتير شاطرين إلا أننا دايمًا بندور على “النفس”، “الروح”، “الشهقة”.
يمكن تستغرب الكلام شوية، بس من خلال البوست ده هنحاول نوضح كام نقطة يمًكن تلخص طريق طويل على حد عايز يبدأ أو حد بيكتب بس دايمًا بيسأل نفسه: هو أنا ليه ببعت ومحدش بيكلمني؟
الفكرة يا عزيزي مش في “رص” كلمات شكلها حلو جنب بعض ولكن هدف الكتابة الإبداعية في العموم والتسويقية بشكل خاص إنك تخطفني من أول كلمة- مش من أول سطر – لأ.
يوم عن يوم بنتعلم ومن أربع سنين مش زي دلوقتي! بس هنقولك الخلاصة اللي وصلنا ليها واللي حابين أنها تتزرع فيك.
✦ أعرف أنت بتكتب المحتوى ده لمين
كلمة “كلاشيه” جدًا بس للأسف فيه ناس حافظها زي ما بتحفظ الدراسات بس عشان تعدي المادة! بس في الحقيقة لما شوفنا مقالات كتير، بعض الناس كانت بتكتب عشان تملى الورقة مش عشان تقول معلومة جديدة، أو تسيب بسمة على وشنا أو حتى تلهمنا. المقالة بتكون مترجمة خالية من المعاني والأحاسيس اللي توصل المعلومة وتسيب أثر في نفس القارئ.
✦ محتوى خالي من الثقافة العربية
يعني لما بتجيب أمثلة بتجيب أمثلة زي دكاترة التسويق اللي دايمًا بيستخدموا شركة آبل والحلم الأمريكي، طيب ليه مفكرتش تتكلم مثلاً عن قصة نجاح عائلة العربي (ده مش إعلان) وإزاي الشركة ليها دور مجتمعي كبير، طيب ليه لما بنفتكر فيلم جامد بنستشهد بمخرجين عالميين وكتاب عالميين، طيب فين الكلام على كاتب سيناريو مصري زي وحيد حامد أو مخرج زي سمير سيف.
✦ ركز في الـ Hook ثم الـ Hook ثم الـ Hook
يا عم ما تكلمنا عربي، ركز في عنوان يشد القارئ ويخليه يقف عندك وميعملش Scroll على بوست تاني! الموضوع مش مجرد عنوان صايع وعادة أحسن عنوان هو اللي بتكتبه بعد ما تخلص كل المقالة أو البوست.
✦ حشو فقرات بلا هدف
بنلاقي المقالة مليانة حشو عدد كلمات لمجرد إنه اطلب من شخص إنه يحدد عدد معين من الكلمات عشان يقضي المصلحة وياخد اللي فيه النصيب، بس لو جيت تقرأ هتلاقي أن مفيش معلومة طلعت بيها فعليًا إلا أنك ضيعت وقت اللي بيراجع واللي بيقرأ وماما وناهد.
✦ أنا عبد الـ Viral
بص أنا هجيب جام Tool كدة وارشقهم في بوست طوييـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــل وقابل يا عم شير وعدد Saves لا حصر له، جميل هتعمل كدة مرة واتنين وثلاثة بس عشان تبني استراتجية محتوى هتعمل ده بمعدل قد إيه شهريًا؟
✦ أنا هبعت وفيه حد بيراجع ورايا
في أوروبا والدول المتقدمة، آه فيه وظايف مخصوص بتعمل ده، بس لو أنت شغال فيرلانس أنت مطلوب منك تراجع وتظبط كل حاجة عشان متسبش انطباع وحش عند العميل أو حتى الشخص اللي بيراجع وراك، هي دي شغلته بس شغلتك تكون دقيق في كلامك وتحافظ على وقته ووقتك.
✦ النكـــــــــــــــــــــــــــــــــــــــــران
يعيش الكائن اللي بينكر إنه محتاج مساعدة وتطوير في مدة طويلة جدا من النكران المصحوب بأيجو عجيب، بل ويبرر لنفسه أعذار، أن الناس هما اللي مش فاهمين مدى ابداع شغله وأن “الدنيا داية عليه دامد” بصوت هدرس. وعلى بال ما يفوق هيكون اللي ذاكر ذاكر واللي كتب كتب.
✦ فين المصادر؟
يعني ليل ونهار بتشوف الدحيح وجاي أما تكتب متحطش مصادر؟ طيب على أي أساس اصدقك لما تكون بتكتب عن معلومة جديدة أو تحديث بيحصل؟ ده غير إن وجود مصدر موثوق منه مهم جدأ لو بتكتب مقالة على موقع لأن ده بيكون عامل قوي بيساعد على تحسين محركات البحث.
✦ العلامة النونو اللي جنب كل فقرة دي
للدرجة دي التفاهة يعني؟ العلامة دي ” ✦ ” أه، ناس كتير بتفقد تركيزها لما تلاقي كلام كتير وبالتالي لو أنت كاتب إيه هتخسره لو الكلام جاي شوية يمين وشوية شمال وحبة فوق وحبة تحت.
✦ الاستسهال
“يلا مطلوب مننا نكتب عن ريادة الأعمال” تقوم فاتح ابننا جوجل وكاتب إزاي تكون رائد أعمال وتقوم مختار أول نتيجة جاية قدامك وتبدأ تكتب “عشر حاجات تعملهم عشان تبقى رائد أعمال” – يا سلام!
أنت عارف فيه كام حد مؤيد ومعارض، طيب هل هتاخد وجهة نظر الناس اللي عندها بيزنس وهي في الجامعة ولا اللي فتحت بيزنس بعد الأربعين؟ طيب هل السوق المصري زي الخليجي؟ هل عندك معلومة عن إحصائيات ريادة الأعمال صحيحة نقدر نرجع لها؟
✦ التشتت
إنك تكون مشتت فتقدم على أي مكان بدون دراسة لطبيعة المكان ده! يعني كل مكان يعتبر مدرسة، ليه طبيعة معينة، يعني متتوقعش تعمل حملات إعلانية تسمع وأنت شغال على كتابة وصف للمنتجات فقط وفجأة الصوت اللي جواك يصحى “أنا هغيره” – You can’t fix a company with a vision – لو الشركة مش مناسبة سيبها بس صدقني هتفضل تحاول في حاجة مش نافعة وهتخسر وقت ومجهود على الفاضي.
مش عارفين نختم بأيه والله بس المهم أنك متكونش اتصدمت مننا، إحنا بنحبك وعايزين نشوف دايماً كتاب وصناع محتوى يكسروا الدنيا