محتوي

23 نوع للإعلانات

سألت نفسك قبل كدة إزاي الإعلانات بتنجح وبتعمل ضجة وبتفضل محفورة في دماغنا لفترة طويلة ممكن تفضل لسنين؟ يعني تبقى اتفرجت على الإعلان وعايز تقوم تشتري المنتج دا دلوقتي.

طيب كام مرة كنت عايز تعيط في إعلان بينادي ويشجع على مساعدة الناس أو بالتبرع للمستشفيات؟ وكام مرة كنت بتتفرج على إعلان وحسيت إن الإعلان دا معمول ليك انت بس وبيوصف حالتك؟

كان فيه مشكلة بتقابلك في حاجة معينة وشوفت اعلان لمنتج في التليفزيون وقدملك الحل؟

خلصت قبل كدة إعلان وأول كلمة جت في دماغك أكاد من فرط الجمال أذوب؟ 

تعالى أقولك 23 شكل أو نوع من الإعلانات وبلغة الماركتينج والكوبي رايترز يُسمى بالـ Appeal. 

والفرق بين الـ Emotional Appeals and Rational Appeals

بس خلي نفسك طويل معايا حبتين عشان الكلام كتير ويستاهل

أول نوع الـ Emotional Appeals:

الشركات بتستخدم النوع دا من الـ Appeals لما تحب تلعب على الجانب العاطفي والمشاعر بتاعت الجمهور وأحيانًا بيتسخدموا الموسيقى بس في توصيل الخدمة أو المنتج بتاعهم وكمان خلق حالة من الترابط بين المنتج والجمهور بشكل كبير.

1) Personal Appeal 

ودي بتهدف إلى إثارة المشاعر من خلال النص المكتوب على الصور أو الموسيقى القوية اللي بيستخدمها الإعلان، وممكن يقنعك باستخدام الحزن، الغيرة، الغضب، السعادة أو أي حاجة فيها مشاعر.

في الاعلان هنا بنك الطعام بيجمع بين الموسيقى ومشاعر التعاطف عشان تخلي الناس تتبرع أكتر.

( إعلان بنك الطعام  )

2) Social Appeal 

كل إنسان بيحب يحس إنه جزء من كيان، والكيان دا بيكون شيء مشهور ومعروف بين الناس، في الـ Appeal دا بيكون كل تركيز الإعلان على الكيان والناس المهتمة بيه، زي إعلان Go bus اللي عملوا الستايل واللوكيشن بتاع مسلسل Chernobyl ودا عشان كان عدد المتابعين للمسلسل كبير، فبالتالي مبيعاتهم هتزيد بسبب شعبية المسلسل الكبيرة والمتابعين للكيان دا.

(اعلان Go bus)

3) Humor Appeal

حس الفكاهة في الاعلانات مطلوب، بس وانت بتعمل إعلان دمه خفيف لازم تبقى عارف كويس مين جمهورك وهيفهموا قصدك إيه، لأن الإعلانات من النوع دا دايمًا بتعمل ضجة كبيرة، والـ Appeal دا يعتبر أقل واحد بيُستخدم في بلاد برا عشان ممكن واحد يشوفه الإعلان مضحك وواحد تاني يشوفه مسيء، إنما في بلادنا العربية الحبيبة بتعرف تاخد أحسن كوميديا منهم في الاعلانات، وهنا اعلان دومينوز بيتزا بيطبق الحس الفكاهي المصري.

( اعلان دومينوز بيتزا )

4) Fear Appeal

كل شخص عنده مخاوف من حاجات كتير، حاجات يعرفها وحاجات تانية ميعرفهاش، في الـ Appeal دا بيهتم انه يظهرلك شكل الخوف من الفقد والخسارة وممكن يكون في شكل توعية، إعلانات بهية خير مثال للـ Appeal دا 

(إعلان بهية)

5) Sexual Appeal

معظم البراندات اللي بيستخدموا الـ Appeal دا بيكونوا شركات تخصص ملابس داخلية زي Victoria Secret و Calvin Klein، ودايمًا تلاقيهم بيستخدموا الناس الأكثر إثارة في العالم للتصوير والإعلان عن المنتج، دا شكل إعلان شركة Calvin Klein في الـ Sexual Appeal 

(الاعلان)

6) Romantic Appeal

مين فينا مش بيحلم يعيش في قصة حب زي الأفلام الرومانسية اللي بتكون مشهورة دي؟ إحنا برضو ممكن نقول كدة عن الإعلانات اللي بتتخذ إتجاه رومانسي، إنها بتحسسك بنفس إحساس الأفلام الرومانسية فبيكون فيها مشاعر حب وإحساس بالحنين، وهسيبك مع اعلان كلورتس تشوف طبقوا الـ Appeal ازاي

(اعلان كلورتس)

7) Endorsement Appeal

بنشوف دايمًا مشاهير ورياضيين بيتحط اسمهم أو صورتهم على منتج سواء كان محمد صلاح وميسي مع بيبسي أو عمرو دياب مع فودافون، ومع كل الأسماء الجامدة دي وعلى الرغم إنهم مش هما صحاب المنتج أو الخدمة بس الإعلان هيعمل ضجة كبيرة ويبقى تريند فبالتالي انت من محبي محمد صلاح والفنانيين فأكيد هتشتري الخدمة زي البطل بتاعك.

(إعلان صلاح والفنانين مع فودافون)  

8) Youth Appeal 

الناس بطبيعتها مش بتحب تكبر في السن وتحس بالشيخوخة وان العمر خلاص مش فاضل فيه كتير، الـ Appeal دا بيبقى موجه للأجيال الكبيرة، بس في الاعلان بيستخدموا الشباب عشان يخلوا المستهلك يشعر إنه صغير في السن ونشيط، ودا بنشوفه دايمًا في إعلانات Snickers 

( اعلان سنيكرز )

9) Popularity Appeal 

في الـ Appeal دا الشركات دايمًا بتحافظ على إن اسمها يكون موجود بشكل كبير في كل حاجة موجودة أو محيطة بالناس، ودا عشان العلامة التجارية أو اللوجو بتاع البراند دا يبقى جزء من يوم الجمهور المستهدف ويعبر عن مدى شعبيتها، وكمان بيستخدموه عشان يخلقوا حالة من الترقب والإثارة عند الجمهور، شركة Paramount Pictures عملت ضجة قبل صدور فيلم baywatch بإجراء ماراثون 300 متر بالحركة البطيئة، وكان الحضور عدد كبير جدًا ومتحمس لإصدار الفيلم.

( اعلان baywatch )

10) Musical Appeal 

الأفلام من غير الموسيقى بتبقى أفلام تحسها ناقصة حاجة كبيرة وبتبقى مش مستمتع بيها، وكذلك انت ممكن تعمل إعلان معتمد اعتماد كلي على موسيقى مناسبة للمنتج بتاعك، تحس إن الإعلان بيحركك ولازم تاخد أكشن تجاه المنتج دا، اعلان شركة Kohler بتقدم في الاعلان دا موسيقى جميلة، تخليك عايز فعلاً تاخد رد فعل وتنزل تشتري المنتج بتاعهم.  

Kohler TV Commercial Touchless Toilet Touch Don’t Touch)

11) Adventure Appeal 

شركات السيارات والسفر اسلوبهم في الحياة عبارة عن رحلة وهما بيحبوا المغامرات، ومن هنا بيستخدموا الـ Appeal دا عشان يقولك إن المنتج بتاعنا ممكن يوصلك للمكان اللي انت عايزه لو بتحب المغامرة زينا، وفي إعلان Jeep دا بيخليك عايز تاخد مفتاح العربية وتروح الشاطئ أو الطرق الفاضية، أو أي مكان الحياة ممكن تاخدك ليه. 

(الاعلان)

12) Empathy Appeal 

التعاطف جزء مهم جدًا في الإعلانات أو في توصيل رسالة والاهتمام بقضية مجتمعية، وبتحس في الـ Appeal دا إن فعلاً هيخليك تتعاطف أو تتفاهم مع اللي فعلاً محتاجين حد يهتم بالقضية، ودا في إعلان اليونيسف وفيه إن العنف المنزلي بيأثرعلى الأطفال و بيفضل عايش معاهم وهما مش حاسين بده.

( اعلان يونيسف )

13) Potential Appeal 

الأحلام ممكن تبقى حقيقة، مع الإمكانيات الموجودة عندك والاصرار. الـ Appeal دا بيهتم أكتر بالمستقبل والأحلام البعيدة وبيجي في دور المُلهم والمُحفز، زي اعلان بنك مصر اللي فرقع في الدنيا وكان اي حد بيحس بأي نجاح بيشغل الأغنية وكأنها بتحركه لقدام

(اعلان بنك مصر

14) Brand Appeal 

لو المنتج بتاعك مشهور دا هيخليك تبيع بأسعار غالية عادي بسبب إن الناس ممكن يدفعوا أي فلوس بس يحسوا إنهم منتمين للبراند لأن دا بيحسسهم إنهم في مستوى أعلى مش هيعرفوا يوصلوا ليه إلا لما يشتروا المنتج، ودا مالوش علاقة بجودة المنتج ولكن كل ما يتعلق بيه هو المكانة، وأفضل مثال لده وهو شركة starbucks، كل الناس عايزة تبقى جزء من البراند حتى من غير ما يعملوا إعلانات، الشعار لوحده إعلان. 

(الاعلان)

تاني نوع وهو الـ Rational Appeals 

في الـ Rational Appeals 

بيكون الإعلان بيناقش قضية حقيقية وموضوعية وحاجات منطقية ولازم يستدل عليها بأرقام وأحداث وكل دا عشان تقدر تخلي الجمهور المستهدف إنه يحدد قيمة المنتج بطريقة مفيش فيها أي شك ولا جدال، وبالرغم من ان الـ Emotional Appeals قوية بس ممكن تكون فيها خدع أو أي حاجة عشان نبيع، انما الـ Rational Appeal بتكون أكثر أصالة وعراقة وبتحسس البراند إنه بيملك السُلطة.

  1. Pain Solution

لما بتواجه مشكلة في حياتك من الطبيعي انك بتدور ليها على حل، الله على النابغة اللي جوايا، في الـ Appeal دا التركيز دايمًا بيكون على حل المشكلة أكتر من إظهار المنتج، وبتكون المشكلة عامة ومشهورة وبتقابل الناس كل يوم، فالبراند بدوره عمل اعلان بيركز فيه على حل للمشكلة بتاعتك مش على المنتج، في إعلان IKEA هنا بيعرضلك مشكلة إن الحاجات بتاعتك مش مترتبة ومحتاجة رف (حل) وهنحلهالك بالمنتج بتاعنا.

(الاعلان)

أو (إعلان ستربسلز)

  1. Scarcity Appeal

في الـ Appeal دا الشركات بتقصد انها تنزل المنتج بتاعها بكميات قليلة ووقت محدود، وبيبقى من الصعب إنك تلاقي المنتج دا وعشان كدة بيبقى مرغوب أكتر للمستهلك، وهنا شركة Coca-Cola عملت حملة إعلانية فترة بسيطة، نزلت زجاجات مطبوع عليها أسماء الناس وكانت كل الناس في الوقت دا بتدور على أسمائهم وأسماء الناس اللي بيحبوهم، وانت اكيد عملت كدة. 

(الاعلان)

  1. Testimonial Appeal

ممكن تعمل إعلان مش ضروري إن الناس تتكلم فيه خالص، في الـ Appeal دا انت بتفكر بطريقة تانية خالص وبتخلي الجمهور بتاعك يشارك في وضع أفكار للإعلانات كمان، ودا بيخلي الناس تتفاعل أكتر مع المنتج، زي حملة حلم الغنا بتاع فودافون مع عمرو دياب

(اعلان حلم الغنا فودافون وعمرو دياب )

  1. Contrasting Appeal

في النوع دا من الـ Appeals واللي يعتبر كل الجماهير بتحبه لأنه بيبقى تنافس شديد بين الشركات، وبتحاول تقدم المنتج بتاعك أو الخدمة في شكل مقارنة مع منتج تاني لشركة تانية وازاي الحياة ممكن تكون صعبة من غير المنتج بتاعك، زي إعلانات اريال وبرسيل كدة، الاتنين بيعّلوا على بعض في الإعلانات

(اعلان برسيل )

  1. Status Appeal

في الـ Appeal دا بيعتمد إنه يظهرلك مستوى المكانة والرقي للبراند وحياة مستخدمين المنتج دا بتبقى عاملة ازاي، انت ممكن تشوف هنا إن دا إعلان أحذية ولكن دا إعلان BMW وهنا بيظهرلك فئة الناس اللي بيستخدموا المنتج بتاعهم وإنهم بيلبسوا أحذية جلد لطيفة شكلها جميل وحبهم لدواسة البنزين وهنا حبوا يوصلوا رسالة لمكانة البراند واتجاهاته.

(الاعلان)

  1. Statistics Appeal 

هنا الشركات بتحب تتكلم بالأرقام والاحصائيات اللي مفيش فيها شك، ويعتبر الـ Appeal دا من أحسن الـ Rational Appeals في توصيل الفكرة للجمهور، في الحملة الاعلانية دي حولوا كل الرجال الاغنياء زي مارك زوكربيرغ و بيل جيتس إلى نساء وهنا بتشوف ان مارك زوكربيرج اتحول لمارلا زوكربيرج وهنا بيوضح قضية عدم المساواة في الأجور بين الرجل والمرأة 

(الاعلان)

  1. Natural Appeal 

أحيانًا لما بتكون صادق وعلى طبيعتك بتسيب آثر في حياة الناس، وكذلك الإعلانات اللي بتتعمل من غير أي تكليف، بتخلي الجمهور يتواصل مع المنتج بشكل طبيعي من غير أي قلق ولا خوف. في الاعلان دا، شركة Lane Bryant بتعمل حملة ImNoAngel وبتظهر الأشخاص بمظهرهم الحقيقي من غير أي تجميل ولا تعديل، فالإعلانات اللي زي دي بتقدم رسالة وفي نفس الوقت بتسيب أثر في أذهان الجمهور المستهدف.

( #ImNoAngel​ Is Back: Sexy Bras for Plus Size | Cacique )

  1. Transparent Appeal 

الشفافية مع الجمهور المستهدف ممكن تفيدك في إعلاناتك، وإنك تكون عارف ان المنتج بتاعك مش هو أحسن حاجة أو فيه عيوب، ف انت بتظهر العيوب الموجودة وبتقول للناس أنا هصلح ده في المنتج الجديد أو نسيبه زي ما هو مش هتفرق،نواعم قدرت تطبق الـ Appeal دا بشكل كويس  ولعبوا اللعبة صح.

( اعلان نواعم )

  1. Beauty Appeal 

في شركات كتير بتعتمد على إظهار الجمال في الخدمات والمنتجات بتاعتهم، يادوب بس كام صورة للمنتج الأصلي ونعمل بيهم إعلان، وهنا الاعلان بيبقى عبارة عن صورة حقيقية أصلية للمنتج من غير أي تعديلات ولا فوتوشوب، الشركات بيركزوا بس على التنظيم وطريقة التصوير وجودة الإضاءة ودا هيبقى مريح للجمهور لأنهم بيشتروا حاجة حقيقية

وفي الاعلان دا شركة West Elm بتظهر جودة منتجاتها في شكل صورة حقيقية مُنظمة وإضاءة شكلها جميل. 

(الاعلان)

وأخيراً، دي كل حاجة بخصوص الإعلانات والـ Appeals اللي وراها، عايزك في كل مرة تتفرج على التليفزيون أو قاعد بتسكرول على الانترنت وشوفت إعلان إبقى حاول تحلل فيه وقول هو خاص بأي Appeal في دول، وحتى لما تيجي تعمل منتجك أو منتج شغال عليه تبقى عارف ممكن تستخدم إيه أو اللي ممكن ياكل مع الجمهور بتاعك. 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق