لما بتقابل عمل درامى حلو وتتفرج عليه وتبقى مبسوط دي حاجه، ولما تقابل عمل درامى حلو وفي نفس الوقت تقدر ترتبط بيه من واقع حياتك خصوصًا لو كان البطل بيشتغل نفس شغلك دي حاجه أجمل. وزى ما في House M.D للأطباء و Suits للمحامين فى Madmen للكوبي رايترز.
المسلسل صاحب السبع مواسم بنشوف معاه مغامرات Don Draper الكرياتيف دايركتور في Sterling Cooper الوكالة الإعلانية الموجودة في مانهتن نيويورك. المسلسل فاز بجوايز زي الإيمي والجولدن جلوب.. فلو لسه مشوفتوش، فايتك كتير.
يمكن الإعلانات النهارده اختلفت عن وقت قصة المسلسل، لكن شخصية زي دون درابر ممكن كـ كوبي رايتر أو حد بيشتغل في مجال الإعلانات تتعلم منها حاجات كتير.
فلسفة الـ Research
يمكن Don Draper مش اكتر حد بيعتمد على الـ Research بالمعنى التقليدى، لكنه بيعتمد على أنه يفهم أكتر الواقع عامل ازاي عن طريق أنه بيعمل الـ Market Research بتاعه. حاجات زي أنه يسأل عميل لشركة منافسة ليه بتختار المنتج دا مش غيره، في أول مشهد في المسلسل.
أفهم الناس
الناس عاوزه حد يقولها تعمل ايه، لدرجة أنها هتسمع لأى حد.. دا كلام Don وفي نفس الوقت يقولك هو بيفكر ازاي، هو عاوز يوصل للناس ويفهمهم. بنلاقي في المسلسل كلامه عن ازاي الناس عاوزه أكتر وان الناس عاوزه تشترى اللي ميعرفوش يشتروه. Don مش بس بيعرف جمهوره ايه، لأ هو بيفهم الناس وطبيعتهم.
كأس التميز
ايه اللي بيخلى منتجك مختلف؟ دون درابير بيقولك أنت مش محتاج تابقى المنتج المختلف، انت محتاج تبقى المنتج اللي يخلى ميزة مشتركة حاجه مختلفة. ودايمًا ركز على الـ USP.. الناس مش هتعرف ليه المفروض تشترى المنتج دا من غير ما انت تقولهم.
ازاي تكتب كوبي؟
علشان توصل للكوبي المناسبة، انت محتاج عقل رايق.. من الحاجات اللي ممكن تعملها أنك تفكر بشكل متعمن عن الكوبى بتاعتك، وبعدها.. أنساها! هيجيلك فكرة تانيه وقتها على ضمانته. طريقة تانية ممكن تستخدمها انك تكتب رسالة لصاحبك بتحاول تخليه يشترى المنتج. عاوز توصل لفكرة إعلان كبيرة؟ فكر فيها كأنك عايش في المستقبل.
عدل.. النسخة التانية أفضل.
النسخة الاولى من أي حاجه هتعملها عمومًا مش هتكون أفضل حاجه، لكنها مسودة لحاجه أفضل.. لكن مع الوقت وكل ما تعدل في مسوداتك أكتر كل ما كانت النتيجة هترضى عنها. تقريبًا النصيحة اللي هيتفق عليها أي كاتب في العموم هي أن أول نسخة من شغلك مينفعش تبقى النسخة النهائية. التعديل وتنقيح شغلك هيخليه أفضل ومقنع وجودته أعلى. من أشهر الجمل اللي قالها دون في المسلسل “أنت كويس.. أتحسن!”
لو شوفت المسلسل ايه تانى انت اتعلمته منه؟