1) النقطة (.)
=ودى بتستخدمها فى أخر الجملة المفيدة، أو لما تخلص كلام خالص.
-خلصت الحكاية، وخلاص إحنا ف آخرها، وصلنا للنهاية وبالخير نفتكرها.
2) النقطتان الرأسيتان (:)
=ودى بتستخدمها وإنت بتنقل كلام عن حد بعد كلمة (قال/ قالت/ يقول…)
-قالتلى: قول حبيتها ولا محبتهاش
ياريتنى قولت: محبيتهاش
-قالى: الوداع
وأنا قلت: ليه
-قالولى: نسيك وعاش بعديك
=أو لما تكون هتقول حاجة كبيرة وتجزئها:
-كل شئ راح مننا: راح حبنا، راح حلمنا
=لما تكون هتفسر حاجة:
-إنتى زى الأرض تمام، وأنا منك: شايلانى وأنا عايش، حضنانى لما بموت، منك وليكى بعود.
3) الفصلة(،)
ودى بقى حكايتها حكاية؛ فنركز بقى يا وَحْش
= بين الجمل اللى ليها علاقة ببعض ف المعنى:
-قالولى كلام مريحينش، وأنا إحساسى منستنيش
-مين اتظلم، ومين ظلم، ده مش مهم!
=بين الجمل المعطوفة على بعض
-ده البر ملوش أمان، والعشق ملوش ضمان، ده رهان ع حدف طوب، ونيشانك سهمه خايب…
=أو تشيل حرف العطف وتحط الفاصلة بدالها
-خدت م الأتوبيس مراياته، خدت م السواق حكاياته، خدت م الركاب تذاكر موت.
= بين الجمل الصغيرة أو أشباه الجمل
-آدى الليل ف جراحه وناره، آدى عذابه، (وسع كده شوية) وآدى مراره.
=بين الحاجة وأجزائها، أو الحاجة وأنواعها
-أنواع الحديد مثلاً:
حديد متين، حديد سليم، حديد جديد، وحديد قديم
حديد يصدك، حديد يهدك، حديد يخلي الحديد يردك
=بعد المنادى
-يا مجنون، مش أنا ليلى! (واهدى بقى.. اهدى)
-يا حبيبى، كلُ ما فى الصمتِ نادى! (إلَّا إنت، خليك متنح كده)
-يا مُهر وحبله سايب، يا ملطشة القلوب، يا جلاب المصايب.
=بين القسم وجوابه (يعنى بين القسم وبين اللى هتعمله)
-الله الوكيل، لأكون ملطملك إسداغك دول
=بين الشرط وجوابه
-تعالى هنا، وأنا أحبك (كسل رهيب)
=قبل الجملة الحاليّة (اللى فيها حال)
– هتروح يومين، وتجينى (جريح)
=قبل الجملة الوصفية (اللى فيها صفة أو نعت)
-حتى الدمعة ف عيونا وكل دى، ذكريات (كدابة)
=بعد كلمة أو عبارة بتمهد للجملة اللى بعدها
-كل ما أنسالك كلامك برجع أفتكره، الكدابين من كدبهم اتمكنوا وكتروا (اللهم احفظنا)
-أول يوم ف العزل، ده اللى بفكر فيه، هعمل إيه بعديه؟
4) الفاصلة المنقوطة (؛)
=بين جملتين: الأولى سبب للتانية/ التانية نتيجة الأولى:
-وأما مات فيا ومت أنا فيه؛ روحتله بيته وعزيته
-ده كان لما يعوز ضحكة ؛ يقوم يرسمها بالمكياج
-وكان لو يوميشوف دمعة ؛ يروح ويشيلها فى المونتاج
-هيمشى خلاص ومش راجع؛ بقاله كتير بيتحمل قسايا عليه
-عليا النعمة، ياسيد، من نعمة ربى يا سيد، لو ما جبت البيبسى بتاعى دلوقتى؛ البلاعة دى هتتقلب بركة دم، يا سيد!
5) الشرطة (-)
=الجملة الاعتراضية
-وأعملك بيتزا ف بيتنا –بجبنة تشد بعيد- بتمنى أقوم من النوم جنبك ع قد ما أعيش…
6)علامة الاستفهام (؟)
=بعد السؤال سواء كان فيه أداة استفهام أو لا:
-أيامنا وحشاك ولا ناسى؟!
-وهى عاملة إيه دلوقت؟ ومين هون عليها الوقت؟
-إنت عبيييييت؟
هل أنت عبييييت؟
=لما تكون شاكك ف معلومة، أو مش متأكد من حاجة:
-هو صحيح الهوى غلاب؟
=سؤال استنكارى وبيكون بعدها علامة تعجب (؟!)
-وأنا يعنى غصبت عليك؟!
-بعتلك ع الواتساب
مشوفتهاش
لا يا شيخ؟!
آه والله، هكدب ليه
7)علامة التعجب (!)
=التعجب
-شوف بقينا إزاى! أنا فين يا حبيبى وإنت فين؟!
-شوق! شوق لمين؟! متقولش ليااااا
-أستاذة صافيناز، إحنا على الهواء مباشرة!
=الفرح والدهشة:
-بجد!!! بتهزرررييي!!!
=الحزن
-هيمشى خلاص ومش راجع!
=الدعاء
-يا ناعس الطرف، لاذقت الهوى أبداً! (ياختى، بركة)
=الدهشة
-أجمل واحدة من غير مجهود!
-أوباااا!
-إيه تاه! إيه تاه! إيه تاه! إيه تاه!
=الاستغاثة
-يا ناس! شوفوا حلاوته يا ناس!
=التمنى
-ليت الشباب يعود يوماً!
-ياريت عندى عصيدة وأربع صوانى مرج!
=التأسف
-أنا بعتذرلك! عن سكوتى وقت ما تحبى الكلام…
=الذم
-عنيكى طلعت لينسز زرقاء!
-يا ملطشة القلوب!
-يا جلاب المصايب!
=التذمر
-أنى زهجت!
=أسلوب الإغراء (يعنى تكرر الكلمة أو الجملة مرتين ماشى؟!)
-الصدق الصدق!
-الحب الحب! الشوق الشوق!
=التحذير
-إوعى يا واد يا رضا تكون بتضحك على عمك الضو!
8)علامة الحذف (…) 3 نقط بس
=للاختصار، أو الاكتفاء بجزء من الجملة عند الاقتباس
-الناس العميقة أو المجروحة دايماً بتستخدمهم ف أخر كلامها وتسألهم ليه يقولك بتتحط بدل كلام كتير يتقال…
إسكريبت: ريم المقدم