فاكر الإعلان القديم دا اللي فضل معلق في دماغك السنة اللي فاتت وفضلت تغنيه في كل مكان حتى وأنت في الحمام. 

تفتكر ليه في إعلانات بتفضل في ذاكرتنا وتعلق معانا وإعلانات تانية لا؟

واحد من الأسرار المهمة وراء نجاح أي إعلان هو الـ insight القوية اللي بتتبنى عليه فكرة الإعلان، وعلشان تقدر تلمس باعلانك قلب وعقل التارجت أودينس بتوعك لازم تدرس الـ insight الخاصة بيه كويس جدًا.

إيه هي الـ insight؟

الـ insight هي إنك بتعمل بحث كامل شامل عن كل ما يخص التارجت أودينس بتوعك، تضرب غُطس في أعماق تفكيرهم وتعرف هما بيهتموا بإيه، وبيحبوا إيه، ومشاكلهم إيه، و بيدوروا على حلولها فين؟

وتجمع كل البيانات والاحصائيات اللي ممكن تساعدك تعرف أكتر عنهم ، والمعلومات دي هي اللي هتساعدك تطلع بإعلان متفصل على شخصية كل واحد منهم.

وزي ما بيقول ديفيد أوجيلفي 

“المعلنون الذين يتجاهلون الأبحاث هم في خطورة قادة الجيش الذين يهملون إشارات العدو”.

إعلان بيريل (اللي بينا هيفضل ما بينا)

• الـ Campaign Insight

بيريل اختارت العلاقة بين الأصدقاء كمدخل للإعلان، واللي دائما بتكون مليانه مواقف جدعنة ورجولة، وبتوريك إن صاحبك الحقيقي هيفضل دائما جنبك حتى في وقت الزنقة والأزمات.

• أسباب نجاح الكامبين

رسالة الإعلان كانت إن صاحبك الحقيقي واللي  زي اخوك دائما هتلاقيه معاك وفي ظهرك حتى في وقت الزنقة واستخدموا جمل زي (وقت اللزوم هيقدرك، واللي بينا إخوة ..اللي بينا رجولة)

الكامبين استخدمت مواقف مختلفة ما بين الصحاب واللي ممكن يقع فيها كل واحد مننا في يومه، كمان وضحت إزاي صاحبه حل المشكلة بطريقة ذكية وملعوبة لفتت الإنتباه، على غير عادتها في استخدام أسلوب السخرية والـ Humor Appeal في إعلاناتها.

بيريل كمان قدرت توظف الـ Brand Position بتاعها في آخر الإعلان من خلال جملة اللي بينا هيفضل ما بينا ..والأخوة ليها طعم تاني بينا. 

كامبين قافشين في التامنة هاتوهالنا 

• الـ  Campaign Insight

في 9 يناير 2022 بدأت مباريات كأس الأمم الأفريقية، واللي بتشارك فيها مصر وبتسعى للفوز بالكأس للمرة التامنة، بعد ما فازت بيه 7 مرات في 1957 و1959 و1986 و1998 و2006 و2008 و2010.

ودعمًا للمنتخب في مسيرته في كأس الأمم الأفريقية نفذت Orange الراعي الرسمي للمنتخب حملة إعلانية علشان تدعمه.

وحرص المشجعين بمختلف فئاتهم على صحة اللعيبة ولياقتهم البدنية علشان يقدرو يفوزوا بالكأس كان هو ال Main Insight الكاملين.

• أسباب نجاح الكامبين

الكامبين كانت عبارة عن ٣ اعلانات ظهر فيها نجوم من المنتخب  ك Iconic Characters وهما محمود حمدي الونش وأحمد فتوح وأحمد حجازي .. وكان الـ Tagline للكامبين قافشين في التامنة هاتوهالنا.

وكانت الرسالة من الإعلان اننا خايفين على صحتك ولياقتك البدنية يا كابتن علشان تقدر تجبلنا الكأس.

 باستخدام Humor Appeal بسيطة قدرت توصف حالات المشجع مع اللعيبة بمواقف كوميدية ذكية، توضح حرص وخوف المشجعين على صحة اللاعبين ولياقتهم البدنية وقت البطولة (هات الكأس تاخد الخوذة) (واحنا عندنا هجمات مرتدة ..كل السوتيه ياكوتش)

الكامبين لعبت على الـ Loyalty اللي عند المصريين لمصر والمنتخب خاصة وقت بطولة مهمة زي كأس الأمم الأفريقية.

شوفت الـ Insight مهمة إزاي يا هيما… يا ابني أهمية الـ Insight للإعلان زي أهمية الروح للإنسان.

عشان كدا هقولك على مثال تاني لإعلان أنت حبيته اووي.

إعلان فودافون للأمهات في عيد الأم

• الـ Campaign Insight

الـ Insight هنا اتبنت على إن الأمومة طبيعة غريزية موجودة في كل أم بالفطرة، هي اللي بتحركها ناحية أولادها وتبقى هي خط دفاعهم الأول ودائما في ظهرهم، الأم تزعق في أولادها ااه بس اي حد تاني لا.

يعني زي ما بنقول كمصريين “أدعي على ابني واكره اللي يقول آمين”

• أسباب نجاح الكامبين

في عيد الأم فودافون نزلت اعلان بتدعم فيه أمهات مصر، وتدعم وقفتهم في ظهر أولادهم، واستخدمت في الإعلان  الـ Emotional Level اللي في حياة كل أم مع أولادها زي (في النادي وفي الشوبينج وفي التجمعات العائلية اللذيذة).

ودا خلى كل أم وأولادها يشوفوا الاعلان ويحسوا انهم مروا بالموقف دا قبل كدا، وإن الاعلان دا بيعبر عنهم كأنه متصور من جوه حياتهم اليومية مع بعض.

الـ Humor Appeal هنا كان من خلال المواقف اللي بتعيشها الأم بشكل يومي مع أولادها، واللي لمس حياة كل أم مع أولادها وخلى رد فعل التارجت أودينس بتاع الاعلان قوي وكبير.

ودلوقتي بعد ما بقينا عشرة مع بعض.. وعشان أنت صبرت معايا لحد هنا. 

فأنا هقولك الزتونة والمحاور المهمة اللي تركز عليه وأنت بتجمع الـ Insight بتاعك.

✦ Demographic Characters

• مين هما التارجت أودينس بتوعك، جنسهم، سنهم ، درجة تعليمهم ، أماكن معيشتهم، حالتهم الإجتماعية.

✦ Personal Interest and Lifestyle

• التارجت أودينس بتوعك مهتمين بإيه، بيحبوا إيه وبيكرهوا إيه، بيتابعوا مين وفين، مشاكلهم إيه وبيدوروا على حلولها فين؟

✦ Brand Perception

• تفتكر عملائك شايفينك ازاي، أنت نمبر وان في مجالك وبيستنوا منك كل حصري وجديد، ولا منتجاتك عفا عليها الزمن ومحتاجة تطوير.

✦ Motivation For Purchasing

• ياترى عملائك بيشتروا منتجاتك ليه؟ علشان الجودة ولا السعر ولا العروض ولا في أسباب تانية؟

لما تجاوب كل الأسئلة دي هيكون معاك معلومات قيمة عن التارجت أودينس بتوعك، وهتقدر تساعدك تبني إعلان ناجح يحقق الهدف منه.

وبعد ما عرفت إن كل إعلان ناجح مبني على Insight قوية، جرب تبص على الإعلانات اللي بتحبها بنظرة مختلفة واستنتج الـ Insight اللي اتبنت عليه فكرة الإعلان وفكر صانع الإعلان وظفها إزاي علشان ينجح إعلانه.

وبشكرك إنك وصلت معانا لحد هنا ونتقابل في مقالة جديدة لطيفة.